tenpo kulupu Nujo 2026

tenpo kulupu nanpa tu tu li kama lon ma Nujo (New York City) lon tenpo suno 2026-06-19 tawa 2026-06-22. sina wile kama lon tenpo kulupu la o pana e sona lon lipu ni.

tenpo kulupu ni la mi wile toki lon ijo suli. kulupu jan li kama lon la ona ale li ken sitelen e toki wan li ken toki e wile ona lon ona li ken pana e ona tawa kulupu ale tawa ni: ona li toki e pilin ona lon ijo suli lon tenpo ni. sina jo e pilin lon ni la o toki e ona lon ma Siko! mi alasa pona e ni lon tenpo kulupu.

toki suli pi tenpo kulupu

#

ijo li sona toki pona li kepeken toki pona li toki pona la ona li lon kulupu pi toki pona. kulupu pi toki pona li ijo ale ni: ona li sona toki pona li kepeken toki pona li toki pona. ijo pi toki pona li pali e ijo kepeken toki pona lon nasin ale li musi lon kulupu pi toki pona kepeken nasin toki pi wile ona. nasin toki en nasin musi li tawa lon insa kulupu lon nasin nasa mute. jan insa wan li lon ala li ken ala lon. mi ale li kulupu.

kulupu li sama kasi pi anpa ma li sama ala kasi kiwen palisa. kasi pi anpa ma li ken tawa poka ale, li pana e palisa sin lon wile lon poka. ijo li kipisi e sijelo kasi la kipisi mute li kama kasi sin. kasi kiwen palisa li kama tan ma kepeken palisa wan li pana e palisa mute lili li jo e lipu lon pini, taso ijo li kipisi e noka pi kasi kiwen la ona ale li moli.

nasin lawa ale li sama ala tawa kulupu pi toki pona. kulupu pi toki pona li olin e jan ale li wile e pona tawa jan ale la ona li utala e nasin ike ni: nasin li wawa e jan wan li anpa e jan ante. kulupu pi toki pona li alasa pona lon pali ona lon nasin kulupu ona. kulupu pi toki pona li wile lon ma ale e nasin pona.

kulupu pi toki pona li wile pali e ijo lon ma pi toki pona ala la ona li wile kepeken mani. nasin mani pi ma mute la kulupu mani o lon o jo e poki mani. poki mani ni li tawa kulupu pi toki pona li tawa ala pona pi jan wan taso.

tenpo sike nanpa 2025 la kulupu lawa li kama lon lon ma Juwese: nimi ona li tenpo kulupu pi toki pona lon ma Amelika lete LLC. tenpo suno nanpa 2026-04-04 la ni li lon: jan wan taso li lon kulupu ni li ken lawa e mani e wawa ona: jan Peton. jan sin li wile kama lon kulupu pali la ona li ken ni lon tenpo kama. ijo pali pi kulupu ni li pali tawa kulupu li lawa e poki mani taso li kama ala jo e mani e wawa tawa ona sama.

ijo li pali tawa kulupu la ona li sama mama tawa kulupu. ijo pi toki pona o pilin tan pali ona sama mama o alasa ala lawa e pali e tenpo kama.

jan lili sina li jan lili sina ala.
ona li jan lili pi nasin ni: ijo lon li wile e ijo lon sin.
ona li kama lon kepeken sina, tan sina ala.
ona li lon poka sina, li jo sina ala.¹

kulupu li wile kama lon kepeken pali tan ijo ale pi toki pona: ijo li pali lon toki pona la ona li sin e kulupu.